JAUNAREN BATAIOA

B zikloa

---

(urtarrilaren 6 ondorengo igandea)

Isaias Profetaren liburutik 42,1-4.6-7
Honela mintzo da Jauna:
“Hona Nik eusten diodan nire serbitzaria,
atsegin zaidan nire aukeratua.
Honengan ipini dut neure espiritua:
berak ekarriko die zuzenbidea atzerriei.
Ez da deiadarka ariko, ez du oihuka hitz egingo,
ez du kaleetan entzunaraziko bere mintzoa.
Kainabera pitzatua ez du hautsiko.
doi-doi piztua dagoen metxa ez du itzaliko.
Zuzenbidea ekarriko du;
ez du etsiko, ez da hautsiko,
zuzenbidea lurrean ezarri arte,
uharteek itxaron duten Haren legea jarri arte.
Nik, Jaunak, zuzentasunez dei egin dizut,
eskutik hartu zaitut;
herri baten elkargo izateko;
atzerrien argi izateko aukeratu zaitut,
itsuen begiak zabal ditzazun,
giltzapetuak espetxetik atera,
eta kartzelako ilunpetan daudenak aska ditzazun.

---

ERANTZUN-SALMOA 28

JAUNA DA GURE SALBATZAILEA.
GURE INDARRA ETA BAKEA.
Eman, Jainkoaren seme-alabok, Jaunari,
eman ospe eta indar Jaunari.
Eman ospe Jaunari bere izenaren ederrez,
jauretsi Jauna apainduria deunez.
Horra Jaunaren mintzoa ur gainean:
Jauna ur ugarien gainean.
Jaunaren mintzoa indartsu,
Jaunaren mintzoa ospetsu.

---

Apostoluen Eginetatik 10,34-38

Egun haietan, Pedrok honela esan zuen: “Garbi ikusten ari naiz, Jaungoikoak ez duela bereizkeriarik egiten; baizik eta onartzen duela, Haren beldur dena eta zuzen dabilena, edozein herritakoa dela ere. Berak bidali zien Israelgo semeei bere hitza, eta guztien Jauna den Jesu Kristok ekarriko zuen bakearen berri ona eman zien.
Badakizue zer gertatu zen, Galileatik hasi eta Judea osoan. Joanek erakutsitako bataio ondoren: Nazareteko Jesusena, alegia, Jaungoikoak Espiritu Santuaren indarrez gantzutua, eta on egiten eta deabruak hartutako guztiak sendatzen igaro zena: Jaungoikoa Harekin baitzegoen.
(Ziklo B-n, ondorengo irakurgai hauek egin daitezke)
Isaias profetaren liburutik 55,1-11
Honela mintzo da Jauna:
“Egarri zareten guztiok, zatozte uretara;
dirurik ez duzuenok ere bai;
zatozte, erosi garia eta jan ordaindu gabe,
ardoa eta esnea hutsean.
Zergatik eralgi dirua, janari ez den gauzetan?
Eta zuen lan-saria, asetzen ez duten gauzetan?
Entzun Neri, entzun eta ondo jango duzue;
janari gozoen atsegina izango duzue.
Erne belarriak, etorri Nigana;
entzun, eta bizkortuko zarete.
Betiko elkargoa egingo dut zurekin,
Dabidi agindu nion agintzaria.
Berau egin nuen neure testigu herrien aurrean,
jabe eta nagusi herridientzat.
Ezagutzen ez duzuen herriari dei egingo diozu,
eta ezagutzen ez zintuen herria
laisterka etorriko zaizu:
Jaunagatik, zure Jaungoikoagatik,
zu goratzen zaituen Israelgo Santuagatik.
Bila ezazue Jauna, aurki daitekeen artean;
hots egiozue, hurbil dagoen artean.
Gizon bihurriak utzi beza bere bidea,
eta gaiztoak bere asmoak:
Itzul bedi Jaunarengana,
eta errukituko zaio;
gure Jaungoikoarengana,
guztiz errukior bait da.
Nere asmoak ez dira zuen asmo;
zuen bideak ez dira nere bide –dio Jaunak-.
Lurretik zerua bezain urruti daude
nere bideak zuen bideetatik,
nere asmoak zuen asmoetatik.
Euria eta elurra zerutik jaisten dira,
eta ez dira berriro hara itzultzen,
lurra ase, ernaldu eta lehertarazi gabe,
ereileari hazia eman diezaion,
eta jaleari ogia;
hala izango da nere ahotik ateratako hitza:
ez da Nigana hutsik itzuliko;
baizik egingo du Nik nahi nuena,
eta beteko Nik agindutakoa”.
ERANTZUN SALMOA Is 12,2-6
HARTUKO DUGU URA POZIK
OSASUNAREN ITURRITIK.
San Joan Apostoluaren epistolatik 1 Jn 5,1-9
Senide maiteok: Jesus Mesias dela sinesten duen guztia Jaungoikoagandik jaio da, eta bizi-emailea maite duenak bizi-emaileagandik jaioa ere maite du. Honetan ezagutzen dugu, Jaungoikoaren semeak maite ditugula: Jaungoikoa maite badugu eta Haren aginduak betetzen baditugu; hau da, izan ere, Jaungoikoa maitatzea: Haren aginduak betetzea. Eta Haren aginduak ez dira astunak. Jaungoikoagandik jaio den guztiak garaitzen baitu mundua; eta mundua garaitu duen garaipena hau da: gure sinesmena.
Izan ere, nor da mundua garaitzen duena, Jesus Jaungoikoaren Semea dela sinesten duena baizik?
Jesu Kristo bataioko uraz eta heriotzako odolaz etorri zen; ez zen uraz bakarrik etorri, uraz eta odolaz baizik. Eta Espiritua da horren testigantza egiten duena, Espiritua egia baita. Hiru dira, bada, testigantza egiten dutenak; Espiritua, ura eta odola: eta hirurok bat datoz. Gizakien testigantza onartzen baldin badugu, are indartsuagoa da Jainkoaren testigantza, eta Jainkoak bere Semearen alde egin du testigantza.

---

ALELUIA Joanek, ikustean Jesus beregana zetorrela, esan

zuen: ‘Hona hemen Jaungoikoaren Bildotsa,
hona munduko bekatua kentzen duena’. ALELUIA.

---

Jesu Kristoren Ebanjelioa San Markosen liburutik 1,6b-11

Aldi hartan honela hotsegiten zuen Joanek:
- ‘Nire ondoren dator, ni baino ahaltsuagoa dena, ni ez bait naiz inor, makurtuta, Haren oinetakoen lokarriak askatzeko ere. Nik urez bataiatu zaituztet; Hark, ordea, Espiritu Santuaz bataiatuko zaituzte’.
Egun haietan, Galileako Nazaretetik etorri zen Jesus, eta Joanek Jordanen bataiatu zuen. Eta berehala, uretatik ateratzerakoan, zerua urratzen ikusi zuen, eta Espiritua uso-idurian bere gainera jaisten. Eta zeruko mintzo batek honela esaten zuen:
- “Zu zara nire Semea, nire Maitea; Zuregan dut nire atsegina”.