URTEAN ZEHAR XXXIV IGANDEA, JESU KRISTO ERREGE
Ezekiel profetaren liburutik 34, 11-12. 15-17
Honela dio Jaunak: “Ni neroni joango naiz neure ardiak biltzera, haien aztarrenei jarraituz. Artzainak, bere artaldea sakabanatuta aurkitzean, ardien aztarrenei jarraitzen dien bezala, hala jarraituko diet Nik neure ardien aztarrenei; eta egun ilun eta lainotsuan sakabanatu diren toki guzietatik nere eskuz aterako ditut.
Neronek larratuko ditut nere ardiak, eta abaro egin araziko diet –dio Jaunak–. Bilatuko ditut nere ardiak, bilduko ihes joanak; lotuko zaurituak; sendatuko gaisoak; gizen eta indartsuak zaindu egingo ditut eta behar bezala larratuko”.
Zuek, ene ardiok, entzun Jaunak dioena: “Epai egingo dut Nik ardi eta ardiren artean, aharien eta akerraren artean”.
ERANTZUN-SALMOA
22
JAUNA DUT ARTZAIN,
EZ NAIZ EZEREN BEHARREAN.
Jauna dut artzain, ez naiz ezeren beharrean;
larre gurietan etzan arazten nau.
Atsedenezko iturrira narama,
eta berpizten dit barrena.
Banarama bidezidor zuzenetatik,
bere izenagatik.
Zoriona eta grazia ditut aldean,
nere bizi guztiko egunetan;
eta Jaunaren etxean naiz biziko
luzaroen luzaro.
San Paulo Apostoluak Korintoarrei 1Ko 15, 20-26a. 28
Senideok: Piztu da Kristo hilen artetik, hildakoen lehen-fruitu bezala. Izan ere, gizon baten bidez etorri bazen heriotza, gizon baten bidez etorri da hildakoen biztuera ere. Adanengan guztiek heriotza duten bezala, Kristorengan bizia izango dute guztiek. Baina bakoitzak bere mailan: aurrena Kristok, lehen-fruitu bezala; gero kristau guztiek, Hura berriz etortzean. Ondoren, azkenekoek, Kristok Jainko Aitari erreinua itzultzen dionean, ahalmena, aginte eta indar guztiak ezereztu ondoren.
Berak eduki behar du erregetza, Jainkoak ‘etsai guztiak Haren oin-azpian ipini arte’. Heriotza izango da, azkenik ezereztuko den etsaia. Gauza guztiak bere menpean aurkitzen direnean, orduan Semea bera ere menpean jarriko zaio, gauza guztiak azpian ipini zizkion Aitari. Eta horrela, guztia izango da Jaungoikoa guztientzat.
ALELUIA Bedeinkatua, Jaunaren izenean datorrena!
Bedeinkatua,
gure aita Dabidengandik datorren erreinua! ALELUIA!
Jesu Kristoren Ebanjelioa San Mateoren liburutik 25,31-46
Aldi hartan, honela esan zien Jesusek bere ikasleei:
- “Gizonaren Semea –eta aingeru guztiak Harekin– bere aintza haunditan etortzen denean, bere jaun-aulki ospetsuan eseriko da; eta herri guztiak Haren aurrean bilduak izango dira. Hark batzuk besteengandik bereiziko ditu, artzaiak ardiak ahuntzengandik bereizten dituen bezala: ardiak bere eskuin aldean ipiniko ditu; ahuntzak, berriz, ezker aldean. Orduan erregek honela esango die bere eskuinekoei:
- “Zatozte, nere Aitaren bedeinkatuok; har ezazue, munduaren sortzetik zuentzat prestaturik dagoen erreinua. Gose bait nintzen, eta zuek jaten eman zenidaten; egarri nintzen, eta edaten eman zenidaten; arrotz nintzen, eta etxean hartu ninduzuen; bilutsik nengoen, eta jantzi egin ninduzuen; gaisorik nintzen, eta ni ikustera etorri zineten; espetxean nengoen, eta Niregana etorri zineten”.
Orduan zintzoek erantzungo diote:
- ‘Jauna, noiz ikusi zintugun goserik, eta eman genizun jaten; edo egarri, eta edaten eman? Noiz ikusi zintugun arrotz, eta etxean hartu; edo bilutsik, eta jantzi? Noiz ikusi zintugun gaisorik edo espetxean, eta joan ginen Zuregana?’
Eta erregek erantzun eta esango die:
- “Benetan diotsuet: Nere senide diren txiki hauetako bati egina, neuri egin zenidaten”.
Orduan honela esango die ezkerrekoei:
- “Alde niregandik, madarikatuok, deabruarentzat eta haren aingeruentzat prestaturik dagoen betiko sutara. Gose bait nintzen, eta ez zenidaten jaten eman; egarri nintzen, eta ez zenidaten edaten eman; arrotz nintzen, eta ez ninduzuen etxean hartu; bilutsik nengoen, eta ez ninduzuen jantzi; gaisorik eta espetxean nengoen, eta ez zineten ni ikustera etorri”.
Haiek erantzungo diote:
- ‘Jauna, noiz ikusi zintugun goserik edo egarri, arrotz, bilutsik, gaisorik edo espetxean, eta guk lagundu ez?’
Orduan erantzungo die:
- “Benetan diotsuet: Txiki hauetako bati egin ez zeniotena, neuri ez zenidaten egin”.
Eta hauek betiko oinazetara joango dira; zintzoak, berriz, betiko bizitzara”.