URTEAN ZEHAR XIII IGANDEA
Erregeen liburutik 2 Erg 4,8-11.14-16a
Behin batean, Eliseo Sunandik barrena igarotzen zelarik, hango andre aberats batek bazkaltzera eraman zuen; eta geroztik Eliseo handik igarotzen zen guztietan, harengana joaten zen bazkaltzera. Andreak honela esan zion senarrari:
- ‘Begira, badakit Jaungoikoaren gizon hori santu bat dela. Egin diezaiogun etxe-gainean gela txiki bat, sarritan baitator gurera; jar diezaizkiogun han ohe, mahai, aulki eta argi-mutil bat, gurera datorkenean bertan geldi dadin’.
Halako batean, etorri zen Eliseo, gela hartan sartu eta bertan etzan zen. Eliseok Gejazi bere morroiari esan zion:
- ‘Zer egin dezakegu andre honen alde?’
Gejazik erantzun zion: ‘Ez du haurrik, eta bere senarra zaharra da’.
Eliseok Gejaziri: ‘Dei egiozu’.
Dei egin zion Gejazik, eta atean agertu zen andrea. Eliseok esan zion: ‘Datorren urtean garai honetan, seme bat izango duzu besoetan’.
ERANTZUN-SALMOA
88
JAUNA, ZURE MAITASUNA
ABESTUKO DUT BETIREN BETI.
Jauna, zure maitasun-egintzak kantatuko ditut beti,
zure leialtasuna iragarriko gizaldiz gizaldi.
Bai, aitortzen dut:
‘Betiko eraikia dago zeruan zure maitasuna,
sendo ezarria zure leialtasuna.’
Zorionekoa, Zu pozik goresten dakien herria!
Zure argitan ibiliko da, Jauna:
zure izenean da egunero alaitzen,
zure salbamen-egintzaz harrotzen.
San Paulo Apostoluak Erromatarrei 6,3-4.8-11
Senideok: Bataioaz Kristo Jesusi lotuak izan garenok, Haren heriotzari lotuak izan gara. Bataioaren bitartez Berarekin heriotzan hobiratuak izan gara; Kristo hilen artetik Aitaren aintzaz biztua izan zen bezala, gu ere biziera berri batean ibil gaitezen.
Beraz, gu Kristorekin hil bagara, sinesten dugu, bizi ere Berarekin biziko garela; izan ere, badakigu Kristo hilen artetik biztu zenez gero, ez dela berriro hilko; heriotzak ez du Harengan gehiago aginterik. Haren hiltzea, bekatuarentzat behin betiko hiltzea izan baitzen; eta Haren bizitzea, Jaungoikoarentzat bizitzea da. Horrela, bada, zuek ere eduki itzazue zeuron buruak bekatuarentzat hilak bezala eta Jaungoikoarentzat biziak, Kristo Jesus gure Jaunagan.
ALELUIA Zuek jatorri hautatua zarete,
errege-apaizgo, enda santu;
Oihuka itzazue, ilunpetik atera eta argi zoragarrira
dei egin dizuenaren egintza harrigarriak. ALELUIA!
Jesu Kristoren Ebanjelioa San Mateoren liburutik 10,37-42
Aldi hartan honela esan zien Jesusek bere ikasleei:
- “Aita eta ama Ni baino maiteago dituena, ez da Niretzat gai; semea edo alaba Ni baino maiteago dituena, ez da Niretzat gai; eta bere gurutzea hartu eta Nirekin ez datorrena, ez da Niretzat gai. Bere bizia beretzat gordetzen duenak, galdu egingo du; eta bere bizia Niregatik galtzen duenak, beretzat gordeko du.
Zuek hartzen zaituztenak, Ni hartzen nau; eta Ni hartzen nauenak, Ni bidali nauena hartzen du. Profeta bat, profeta delako, hartzen duenak, profeta-saria izango du; eta zintzo bat, zintzo delako, hartzen duenak, zintzo-saria izango du. Nire ikasle delako, txiki hauetako bati baso bat ur hotz edateko ematen dionak, benetan diotsuet, ez du galduko bere saria”.