URTEAN ZEHAR XXIX IGANDEA
Sarrerako antifona
Deika naukazu, Jainko, entzuten bait nauzu: aldera iezaidazu belarri hori, nere hitza entzun ezazu. Gorde nazazu begi-ninia bezala, zure hegalen itzalpeak ezkuta nazala.
Kolekta otoitza
Jainko ahalguztidun betierekoa,
egizu, Zuri eskainirik bizi gaitezela beti
eta bihotz leialez serbitza zaitzagula.
Zure Seme Jesu Kristo... AMEN.
Isaias profetaren liburutik 45,1.4-6
Honela mintzo zaio Jauna bere gantzutuari,
eskutik daraman Zirori,
honek menperatuko baititu atzerriak,
eta erregei gerriko armak kenduko dizkie;
ateak bere aurrean zabalduko zaizkio,
eta sarrerarik ez zaio itxiko;
“Jakob nere serbitzariarengatik,
Israel nere aukeratuarengatik,
zeure izenez deitu zaitut,
izen haundi bat eman dizut,
zuk Ni ezagutzen ez banauzu ere.
Ni naiz Jauna, eta ez da besterik;
ez da jainkorik, Ni baizik;
Nik jazten dizkizut gerriko armak,
zuk Ni ezagutzen ez banauzu ere;
eguzki-alde batetik besteraino jakin dezaten,
ez dela Ni besterik.
Ni naiz Jauna, eta ez da besterik”.
ERANTZUN-SALMOA
95
JAUNARI KANTA, ONA BAIT DA,
HAIN DU HAUNDIA BERE BETIKO ERRUKIA.
Kanta Jaunari kantu berri,
kanta, lur osoa, Jaunari.
Kanta Jaunari, bedeinka haren izena,
iragarri egunez egun Harengandiko salbamena.
Zabaldu Haren ospea atzerrietan,
Haren mirariak herri guztietan.
Jauretsazue Jauna jantzi gurenean,
ikara zaitezte, lurbira guztia, Haren aurrean.
Esazue atzerrietan: ‘Jauna errege da,
herriak zuzenbidez epaitzen ditu’.
San Paulo Apostoluak Tesalonikarrei 1 Ts 1, 1-5b
Paulo, Silbano eta Timoteok, Tesalonikan Jaungoiko Aitaren eta Jesu Kristo Jaunaren elizbatzarkide zaretenoi: grazia zuei eta bakea.
Jaungoikoari eskerrak ematen ari gara beti zuen guztiongatik, gure otoitzetan etengabe gogoan zaituztegula. Jainko gure Aitaren aurrean gogora ekartzen ditugu zuen sinesmen-egintzak, zuen maitasun-lanak eta itxaropenaren sendotasuna Jesu Kristo gure Jaunarengan.
Badakigu, senideok, Jaungoikoaren maiteok, Hark aukaratuak izan zaretela. Izan ere, hotsegin zitzaizuen Ebanjelioa ez zen hitz hutsetan gelditu zuengan; Espiritu Santuaren indar aberats bihurtu zen eta sinesmen sakon.
ALELUIA Izar argiak bezala agertzen zarete munduan,
bizitzaren zentzubidea emanez. ALELUIA!
Jesu Kristoren Ebanjelioa San Mateoren liburutik 22,15-21
Aldi hartan, farisearrek batzarre egin zuten, Jesusi hitzetik nola helduko zioten; eta beren ikasleetako eta Herodesen aldeko batzuk bidali zizkioten. Hauek galdetu zioten:
- ‘Maisu, ba dakigu egizale zarela, eta Jaungoikoaren bidea egiaz erakusten duzula, inorengatik atzera egin gabe, ez bait duzu nor zein den begiratzen. Esaiguzu, beraz, zer deritzazu: zilegi al da Zesarri zerga ematea, ala ez?’
Jesusek, haien azpikeria ezaguturik, esan zien:
- “Itxurazale maltzurrak! Zer zabiltzate Ni zirikatzen? Erakustazue zerga-txanpona”.
Haiek denario bat ekarri zioten. Berak orduan:
- “Norenak dira, irudi hau eta idatzi hau?”
Eta haiek:
- ‘Zesarrenak’.
Jesusek orduan:
- “Emaiozue, bada, Zesarri Zesarrena, eta Jainkoari Jainkoarena”.